ചായ

ഞാൻ
ചായകുടിച്ച്
തീർക്കുന്നതുപോലെ
എന്നെയുമാരോ
കുടിച്ചു വറ്റിക്കുന്നുണ്ട്
ആരാണെങ്കിലും
തീരുമ്പോൾ
ഗ്ലാസ്
ഒന്നുകഴുകി വെച്ചേക്കണേ!

ദിവസം

അറക്കവാളിലൂടെ
കാലം
നിയന്ത്രിത വേഗത്തിൽ
വായ്ത്തലതിളക്കി
ചുറ്റിയോടിയിരിക്കെ
അറവുമേശയിൽ
പുറം കറുത്ത
അകം വെളുത്ത
തടിക്കഷണം
പിളർന്നുവീഴുമ്പോഴേ അറിയൂ
നടുവിലൂടെ വാൾ പോയതും
ഒരു ദിവസം കഴിഞ്ഞതും.

കമ്പുകള്‍

ഐസ്സ് ഈമ്പി ഈമ്പി
കമ്പോളമെത്തി
കമ്പോളത്തില്‍
നിന്നുനോക്കിയാല്‍ കാണാം
കുരിശ്ശടിക്കുമേലെയും
പിന്നിലുമായി
ഐസ്സ് തീര്‍ന്നുപോയ
ഈരണ്ട് കമ്പുകള്‍

മിണ്ടാട്ടം

വിരലില്ലാതെ തൊടും,
ഒച്ചയില്ലാതെ മിണ്ടും,
നീയും ഞാനുമറിയില്ല.
എന്തേ എന്ന് തിരിഞ്ഞ് നീയും
എന്തോ എന്ന് കേട്ട് ഞാനും
നിർത്തിയിട്ടിരിക്കുന്ന ബസ്സിന്റെ
ബോർഡ് വായിക്കും.

മിനുസം

മിനുസപ്പെട്ട്
മിനുസപ്പെട്ട്
ഉമ്മറത്ത്
അലങ്കാരത്തിനോ
തറയിലോ
വിരിച്ചിടാമെന്നായി

ഈ മിനുക്കം
ഇങ്ങനെ തുടർന്നാൽ
ഒന്നു തെന്നിവീഴാൻ പോലും
ആരും വരാതായാൽ
എവിടെ വിരിച്ചിടും
എവിടെ കിടത്തും
ഈ മിനുസങ്ങളെ?

കുഴികൾ

ഒറ്റക്കുഴിയെ
ശവക്കുഴി
എന്നുവിളിച്ചിട്ട്
ഒന്നിലേറെ
കുഴികളെ
വീട് എന്നു വിളിക്കും.

ഗൃഹപാഠം

പാടം

വയറിന്റെ
തീപിടുത്തത്തിന്‌
കാക്കിയൂണിഫോമിട്ട്
ഗുണ്ടുമണിപോലുരുണ്ട്
നിരന്നുവരുന്നുണ്ട്
അഗ്നിശമനസേനാംഗങ്ങളുടെ
സൈന്യവ്യൂഹം.

മില്ല്

യൂണിഫോമെല്ലാം
അഴിച്ചുവെച്ച്
പെൻഷൻപറ്റി
തീയിലേക്കുചാടാൻ
ഒരുങ്ങുന്നുണ്ട്
ഗുണ്ടുമണികൾ

വെന്തുപോകുന്നതിൻമുൻപ്
ഇങ്ങനെയെത്ര ഗൃഹപാഠങ്ങൾ